ถามข่าวไทบ้านฯ

ถามข่าวไทบ้านฯ

แถลงกลอนวอนต้านถือโองการออกมากล่าว 

คิดถึงชาวพี่น้องมหาฯหม่องถิ่นเทียว 

คำเว้าเกี้ยวแถลงตอบเติมสาส์น 

หลายกระแสวันวานกะหล่องไหลไปคือน้ำ 

เพลินเดินย้ำลืมถลำอาจไปหม่อ 

คันมื้อได๋ใจท้อขอแฮงฟื้นได้พักเซา 

คือคนเมามีมื้อส่างยามเมินหมางให่ฮักตื่ม 

เอาใจใส่พอได้ปลื้มสิลืมซ้ำเรื่องทุกข์จน 

หลายหมื่นคนยังสนเท่ห์เฮฮาประสาหม่วน 

บ่ได้กวนเกือกส่นให่ไผป้อยบาปเวร 

เรื่องผิดตกขอยกเว้นอาจมีแหน่ย้อนลืมหลง 

ให่ดำรงค์สัมพันธ์ฮักแพงกันอยู่คือเค้า 

บ้านมหาฯเฮาเป็นดั่งเฮือนหลังน้อยรอคอยควมอบอุ่น 

ขอบพระคุณที่หล่ำเยี่ยมมายามบ้างแต่ละคราว 

หลายฝนหนาวรวมกวมฮ้อนเอื้ออาทรกันทุกถิ่น 

ยามถวิลในใจพ้อประสานเชื่อมสืบต่อไป 

อยู่เมืองไทยหรือไกลโพ้นอีกหลายคนหวังสร่างก่อ 

อยากเห็นหน่ากะบ่พ้อขอเป็นเพื่อนแบบกิ๊กนำ 

แค่ขำขำกันเด้อจ้าอย่าหัวซาพ่อลูกอ่อน 

นามมะกรจำจื่อไว้แนมเห็นป้ายกะแวะมา 

บ้านมหาฯเฮายังตั้งฐาปะนังคือไม้แก่น 

มีแฟนแฟนอยู่ทั่วหล้าเพ-ลานี่หากย่อมเยา 

หรือซุมเฮาเซาปลื้มลืมแนวคิดติด"Line"ใหม่ 

ถิ่ม"ไฮไฟ"บ่อยากเว้าเซาแล้วบ่อยากเห็น 

ไปสนุกตื่นเต้นเหล่น"Facebook"สนุกสนาน 

เวปอิสานสิตกเทรนด์หว่าบ่เป็นหล่ะน้อน้อง 

ฮีตสิบสองคองเค้าเงียบซึมเซาเป็นบ่หม่วน 

อาวะสานก่อนสิม้วนมาขวัญเอิ้นดอกส่อยกัน…หนาแพงพันนนน

บทความโดย

บ้านมหา.com

คิดฮอดผู้ลางคน

ยามเมื่อ เดือนสามค้อย ลมวอยๆพัดใบหมาก
ใจอ้ายหากห่วงน้อง คะนิงล้ำฮ่ำเพิง

นิททะเนิ้ง นอนอยู่เอกา
แนมจันทาทอแสง แฮ่งคะนิงนำน้อง
นวลละอองละออหน้า อินทิราแต้มแต่ง คำเอย
เจ้าสิแงงเบิ่งฟ้า คะนิงหน้าบ่าวพี่ซาย บุเด

ฮู้บ่นอ ว่าอ้าย นอนนั่งบ่มีสุข
ใจหาก ทรมานทุกข์ ท่อทะลอนทะลายเยื้อน
คืนใด..เดือนลาฟ้า ปานนางลาจากพี่
ดวงฤดีหม่นเศร้า แท่นอเจ้าแจ่มพระจันทร์ พี่เอยฯ

อี่สานลืม

ฝากไมตรีแต้มไว้ฮอนฮ่ำยามไกลกัน
ต้อนสัมพันธ์แพงฮักมาห่อโฮมโทมถ้อน
ย้อนย้านป๋าไลถิ่มคองอีสานบ่คือเก่า
คะนิงนำทุกค่ำเซ้างายง่วมกะห่วงหา
อาหังข้า..ทองแดงขอแจกหว่าน
ผญาบ้านภาคพื้นอีสานกว้างข่วงพะลาน
สิขอมาจาต้านแนวมูนเก่าแต่คราวหลัง
มีอีหยังหลายอันมาเขยจาไขเว้า
ให้เจ้าซ่อยคะนิงถ่อน..ปูมหลังครั้งพ่อแม่
ให้ซ่อยกันเก็บเมี้ยนแหน่..ซ่อยเผยแพร่สืบไว้ให้เนาว์ยั้งฝั่งอีสาน

ผญาว่าด้วย ความทุกข์และสุข

ทุกข์เพิ่นบ่ว่าดี มีจั่งว่าพี่น้อง ลุงป้าเอิ้นว่าหลาน 
ทุกข์คอบปาก ยากคอบท้อง เคยแล้วอยู่บ่เป็น 
ทุกข์บ่มีเสื้อผ้า ฝาเฮือนเพกะพออยู่ ทุกข์บ่มีข้าวอยู่ท้อง นอนลี้อยู่บ่เป็น 
ทุกข์กายอยู่ได้ ทุกข์ใจอยู่ยาก 
ทุกข์ให้เลี้ยงม้า กำพร้าให้เลี้ยงหมู 
บ่ทุกข์บ่ยาก บ่อึดบ่อยาก 

มีเงินเว้าได้ มีไม้เฮ็ดเฮือนงาม
มีเงินให้เพิ่นกู้ มีซู้ให้เพิ่นเล่น (นี่กะทุกข์) 

สุขเพราะมีข้าวกิน สุขเพราะมีดินอยู่
สุขเพราะมีคู่นอนนำ สุขเพราะมีคำเต็มไถ่
สุขเพราะมีเฮือนใหญ่มุงแป้นกระดาน สุขเพราะหลานหลายนั่งเฝ้า 

อยากทุกข์ให้เป็นนายคน อยากสาละวนให้เอาเมียน้อย
อยากจนให้ขี้ถี่ อยากมีให้ทาน
อยากทุกข์ให้เป็นนาย อยากซำบายให้เป็นแหล่ง
อยากทุกข์ให้ค้าควย (ควาย) อยากรวยให้ค้าโบกค้าเบี้ย
อยากมีหลายมันไฮ้ อยากได้หลายมันตาย
อยากมีให้ยืมเงินเพิ่นไปค้า อยากขึ้นฟ้าให้ฆ่าเจ้าเอาของ
ทุกข์ยากฮ้าย ขอขอดแลงงายก็ดี อย่าได้ลืมคำสัตย์ เที่ยงจริงคำมั่น